غرفة_405
.
انا تمريض عنايه مركزة بس عنايه عزل بمعنى ان كل مريض بيكون فى غرفه منفصله ومعاه فرد التمريض المسؤل عنه لوحدهم.
مافيش غير ممكن الطبيب يمر علي الغرفة مره او اتنين فى الشيفت كله.
و العمال بتمر نفس الشىء او عند الطلب و باقى الوقت بنكون لوحدنا.
المفاجئه لما تحصل حاله وفاه بتفضل متلازمة على الاجهزه لمده ساعتين او اكتر بعد الوفاه تحت الملاحظه.
و دا اجراء قانونى و دا مجال شغلى اللى قضيت فيه 12 سنه و شوفت حالات وفاه بعدد شعر راسي و منهم حالات كتيييير اوووى صعب تتنسي بس الحاله دى غيرهم كلهم.
عشان كانت فى غرفه_405 الغرفه المسكونه و كلنا متأقلمين مع سكانها .....
الحاله الى هحكيلكم عانها يوم دخولها المستشفى الاطباء نصحو الاهل انهم يخدوها البيت تموت افضل بدل المصاريف عشان هى بتحتضر ولكنهم اصروا على دخولها العنايه.
الحاله للاسف كانت واعيه يعنى مش فى غيبوبه و عارفه انها خلاص بتموت احنا و اولادها دايما كنا بنفكرها بزكر الله وانها تتشاهد .
فضلت فى 405 حوالى 4 ايام اهلها منتظرين سماع خبر الوفاه وكلهم زاروها على سبيل الوداع الى ان جائت اللحظه الحاسمه .
النبض بداء يقل و نسبه الاكسجين فى الدم بتقل طلبنا الطبيبه و عملنا انعاش للقلب.
رغم اننا عارفين انها فى كل الاحوال هتمووووت وفعلا بعد ساعه متواصله من الانعاش و بدون اى استجابه للقلب اعلنت الطبيبه خبر الوفاه .
رسم القلب كان خط مستقيم على 2 من الاجهزه جهاز رسم القلب التقليدى و جهاز صدمات القلب المستخدم فى الانعاش.
و ده لمده ساعه كامله رغم كل المجهود الى عملناه لانعاش القلب و لكن عمرها كان خلص و تم ابلاغ الاهل و كتابه شهاده الوفاه.
و طبعا كان لازم انتظر معاها فى 405 لمده الساعتين القانونيين و بداءت المغامره .
السيدة اللي ماتت بداءت تصدر اصوات غريبه زى صوت "طاءطاءه" (صوت الأسنان) فتجاهلت الموقف وعملت نفسي مش واخده بالى و كأنى منهمكه فى كتابه اخر الكلمات فى ملف وفاتها.
ولكن الصوت اتكرر تانى تؤتؤتؤ اتجمد الدم فى عروقى وبداءت ابص للاجهزه ال بتقول ان الحاله ميته من ساعه او اكتر بشويه .... استعزت بالله من الشيطان و حاولت اركز فى الكلام ال بكتبه ولكن ... تؤتؤتؤ الست شكلها فى حاجه مش عجباها هنا ماقدرتش اسكت فتحت باب 405 ومش عارفه كان شكلى ايه بس انا كنت حاسه انى مافيش دم ف جسمى اصلا.
لاقيت واحده من زمايلى بتجرى عليا بتقولى مالك ماقدرتش اتكلم شاورتلها على الحاله و قفلنا الباب علينا لاقيناها تؤتؤتؤ .مصممه يعنى فا زملتى كان ليها نفس رد الفعل.
بصت للاجهزه الى بتقول ان الحاله متوفيه و هى بنفسها كانت حاضره عمليه الانعاش لكنها قالتلى بمنتهى البراءه يمكن تكون ما مامتتش .
و طلبنا الطبيبه كل دا واهل الحاله بره الغرفه بيخدو العزا من المقربين ليهم .
و خلال دقايق جت الطبيبه و لما حكينالها ضحكت و قالت يمكن بيتهيألكم دا مش ممكن دى متوفيه من اكتر من ساعه تقريباا.
وفجاءه تؤتؤتؤ والمره دى الصوت كان عالى وخفنا اهلها يسمعوه يفتكرونا كدبنا فى خبر وفاتها.
و احنا التلاته بصينا للاجهزة و بعدها للجثه لاقينا وجهها و ملامحها بتتغير و شكلها بقى غرييب وكانها هتتحول مثلا ...الدكتوره رجعت خطوتين للخلف و قالتلنا خلصوا شغلكم و خرجوا الحاله دى من هنا بسرعه و اوعوا حد من اهلها يحس هيقولوا انها لسه عايشه.
و فضلت اتحايل عليهم مايسيبونيش اقفلها لوحدى و فعلا كنا 2 تمريض و عامله مع بعض .
و الجثه تحس انها بتكلم حد بننظر ليها شايفنها بتكشر ساعات و بتبتسم ساعات و تؤتؤتؤ ساعات و فضل الموضوع لغز مالهوش اى تفسير عندنا ... و طبعا 405 من وقتها مافيش حاله تدخلها و تخرج عايشه كلهم بيموتوا... المرعب انى وانا بكتبلكم الحكايه دى سامعه اصوات رجلين بتجري فى الصاله و انا لوحدى فى البيت